Akigera ku Igororero Andrew Corley, yakiriwe n’umuyobozi w’Igororero rya Nyarugenge S SUPT Patrick Muragizi, asobanurirwa uburyo RCS ikorana na Prison Fellowship anamutembereza aho abagororwa bigira imyuga itandukanye mu rwego kubafasha kugororoka bya nyabyo, akomereza mu gipangu aho yasanze abagororwa n’abantu bafunze bamutegereje banezerewe akorwa ku mutima na bamwe mubatanze ubuhamya bw’uko inyigisho z’isanamitima bahawe n’umuryango Prison Fellowship zabakengeye zikabafasha guhinduka ubu bakaba barabohotse.

Mukamuganga Esther ufungiye icyaha cy’ubwicanyi yakoreye umugabo we yavuze ko inyigisho yahawe n’umuryango Prison Fellowship Rwanda zamufashije kwiyakira no guhinduka.

Yagize ati” Nkimara gufungwa kwakira igihano nari nahawe cy’imyaka 15 byarananiye ngahora nigunze kubera icyaha nari nafungiwe cyo kwihekura, umuntu umwe yaje kunsanga aho nari nicaye ambwira ko ngomba kwitabira inyigisho zitangwa n’umuryango Prison Fellowship, natangiye kuzikurikirana zikagenda zimpindura uko bwije nuko bukeye ndabohoka numva ko hakiri icyizere cyo kubaho, maze imyaka 12 ndigukora igihano ndihafi gutaha ariko mba numva umutima wanjye ukeye ndetse ndi kurwego rwo gufasha abandi bari hasi nkuko nanjye narimeze.”

Sezibera Celestin uregwa icyaha cya Jenoside wahanishijwe igihano cya burundu ariko akaba ataremeraga uruhare yagize muri icyo cyaha, yavuze ko yacengewe n’inyigisho arafunguka yemera uruhare rwe muri Jenoside.

Yagize ati”Mbere numvaga ntashaka kugaragaza uruhare nagize muri Jenoside kuko umutima wanjye wari warinangiye, ariko maze gukurikirana inyigisho z’umuryango Prison Fellowship narabohotse nemera uruhare rwanjye kuko zari zimaze kuncengera, nemera uruhare nagize muri Jenoside ndetse nsaba n’imbabazi numva umutima wanjye urabohotse, mubyukuri izi nyigisho zaramfashije kuko iyo zitaza kubaho sinari kuzapfa mbohotse ariko ubu umutima wanjye urakeye.”

Umuyobozi  wa Prison Fellowship International Andrew Corley, yishimiye uburyo umuryango ahagarariye wagize uruhare rwiza mugufasha abagororwa asaba n’abandi kwitabira izo nyigisho baharanira kuzataha barakiriye agakiza.

Yagize ati” Kuba muri hano si iherezo ry’ubuzima bwanyu, nyuma yo gusoza ibihano muzasubira muri sosiyete, kuba warakoze icyaha si igitangaza ahubwo nyuma yo kugikora witwaye gute, ubuhamya numvise bwankoze ku mutima kubw’inyigisho z’umuryango mpagarariye zafashije abazikurikiranye gufunguka amarembo y’imitima yabo bakabohoka bakemera kwatura kandi bari barinangiye, ndabishimira Imana nshimira kandi n’urwego rw’uRwanda rushinzwe Igorora dufatanya umunsi ku munsi, tuzakomeza guharanira icyatuma izina ry’uwiteka rikomeza gushyirwa hejuru kuko ibi sitwe tubikora n’Imana ibikora. Ndabakunda.”

Prison Fellowship international ni umuryango w’uvugabutumwa utegamiye kuri Leta ufite inshingano zo kogeza ijambo ry’Imana muri za Gereza no mumagororero hirya no hino ku isi mu rwego rwo gufasha abakoze ibyaha kudaheranwa n’agahinda ahubwo bakabohoka bakakira agakiza binyuze mu nyigisho bahabwa n’uwo muryango zibafasha kongera kwisuzuma.

Yasuye aho abagororwa bigira imyuga itandukanye mu rwego rwokubategura kuzasohoka uwo mwuga ukabagirira umumaro.