Uyu muhango wabereye ahitwa Chikurubi Dam View witabiriwe na Minisitiri w’Ubutabera, Ibikorwa by’Amategeko n’Inteko Ishinga Amategeko wa Zimbabwe, Hon. Ziyambi Ziyambi, n’Umunyamabanga mukuru wa Ambasade y’u Rwanda muri Zimbabwe, Madame Nikuze Nkusi Euphrasie.

Ni amasomo yari amaze umwaka wose agamije guteza imbere ubumenyi mu buyobozi bukuru n’imiyoborere mu Magororero y’ibihugu byombi ku bufatanye n’amasezerano ari hagati y’Urwego rw’u Rwanda rushinzwe Igorora (RCS) n’Urwego rushinzwe Gereza n’igorora muri Zimbabwe (ZPCS). Amasomo yibanze ku ngingo z’ingenzi zirimo politiki n’imiyoborere y’amagororero, igenamigambi, kurinda ibyago byose byavuka mu magororero, uburenganzira bwa muntu, gahunda zo kugorora no gusubiza abagororwa mu muryango, hamwe no kwita ku mibereho myiza y’abakozi.

Abarangije aya masomo bahawe imidari n’impamyabumenyi zitandukanye mu masomo bize harimo Impamyabumenyi y’icyiciro cya mbere (Diploma) mu Guhanga imirimo n’Ubuyobozi itangwa na ‘Zimbabwe Open University’, Impamyabumenyi mu micungire n’imiyoborere y’amagororero gitangwa n’Ishuri Rikuru rya ‘ZPCS Staff College,’ ndetse n’impamyabumenyi mu masomo ngengabitekerezo (Ideology) itangwa n’Ishuri rya Chitepo School of Ideology.

Mu ijambo rye, Minisitiri Hon. Ziyambi Ziyambi yashimiye cyane abarangije amasomo ku bwitange n’ikinyabupfura bagaragaje mu gihe cyose cy’amahugurwa. Yagaragaje ko ubuyobozi bufite ireme mu Magororero ari inkingi ya mwamba mu kubungabunga umutekano, guteza imbere gahunda zo kugorora no kwita ku burenganzira bw’abagororwa n’abafunzwe.

Iki gikorwa kigaragaza umuhate wa Leta y’u Rwanda wo guteza imbere Urwego rushinzwe Igorora binyuze mu kunoza imikoranire no gusangira ububenyi n’ibindi bihugu bitandukanye.