Ubuyobozi bw’Umujyi wa Kigali bwasuye abagororerwa mu Igororero rya Nyarugenge

Uru ruzinduko rwitabiriwe n’Abayobozi bashinzwe Imiyoborere mu turere tugize Umujyi wa Kigali, Umuvugizi w’Umujyi wa Kigali Madam Emma Claudine Ntirenganya, Abanyamabanga Nshingwabikorwa b’Imirenge yose yo mu turere tugize Umujyi wa Kigali, Abanyamadini, Abahagarariye Ingabo na Polisi mu mujyi wa Kigali.

Abayobozi mu nzego zitandukanye z’Umujyi wa Kigali bari mu bazanye na Madame Urujeni Martine.

Ni uruzinduko rwari rugamije kuganiriza abagororwa kuri gahunda y’ubumwe n’ubudaheranwa by’Abanyarwanda ndetse n’icyo byabafasha haba mu igororero ndetse no mu gihe bazaba basubiye mubuzima bwo hanze barangije ibihano.

Umuyobozi w’Igororero rya Nyarugenge Senior Superintendent Patrick Muragizi, wanahahaye ikaze aba bashyitsi, yabasangije ishusho muri rusange y’imibereho y’abagororwa, ashimira Umujyi wa Kigali uburyo ufatanya na RCS mu gukemura ibibazo by’abagororwa ndetse n’imiryango yabo basize.

Hatanzwe ikiganiro cyagarutse ku kwezi kwahariwe Ubumwe n’Ubudaheranwa by’Abanyarwanda cyatanzwe na Padiri Donatien Twizeyumuremyi aho yagarutse ku mpamvu zatuma abanyarwanda bava muguheranwa n’amateka mabi yaranze igihugu cyacu, ahubwo bakareba ibyabateza imbere ndetse n’ibyabahuza nk’Abanyarwanda.

Inama yitabiriwe n’Abakozi ndetse n’abagororwa bo mu Igororero rya Nyarugenge.

Nyuma yo kuganizwa n’abayobozi batandukanye, abagororwa by’umwihariko abasanzwe batuye mu turere twose tugize  Umujyi wa Kigali bahawe umwanya batanga ibitekerezo , ibyifuzo n’ibibazo, aho ibibazo byinshi byagarutse ku buzima bw’imiryango yabo yasigaye hanze y’igororero. Hanabajijwe ku by’imitungo basize ugasanga yarigabijwe n’abandi ba nyir’ubwite batabizi.

Umuyobozi wungirije w’Umujyi wa Kigali ushinzwe Imibereho myiza n’Iterambere ry’Abaturage Madam Urujeni Martine afatanyije n’abandi bayobozi babishinzwe n’abahagarariye uturere twa Nyarugenge, Gasabo na Kicukiro bijeje abagororwa ko bagiye gufatanya n’izindi nzego zibishinzwe mu gukemura ibibazo bagaragaje, kuburyo mu mpera z’uyu mwaka bazabwirwa aho bigeze ndetse n’ibyakemuwe. Umuvugizi w’Umujyi wa Kigali Ntirenganya Emma Claudine nawe yijeje abagororwa ko mu minsi mikuru isoza uyu umwaka, ku bufatanye na RCS bazabategurira ibirori byaba ngombwa bakazazanirwa abahanzi bakunzwe mu Rwanda bakabataramira.

Madam Urujeni yashimiye Igororero rya Nyarugenge n’abagororwa bahagororerwa mu kuba nta myitwarire mibi ikunze kubagaragaraho anabasaba ko bakomeza mu kumva akamaro k’ubumwe n’ubudaheranwa by’Abanyarwanda ndetse ko no mu gihe batashye bakazagaragaza itandukaniro n’uko batekerezwa mu muryango mugari.