RCS yizihije Umunsi Mpuzamahanga w’umugore wo mu cyaro

Ibi birori byitabiriwe n’umuyobozi w’Akarere wungirije ushinzwe Ubukungu Kagabo Rwamunono Richard akaba ari nawe wabiyoboye, byitabiriwe n’abandi n’abyobozi b’imirenge ya Mwurire na Munyiginya, Uhagarariye Umuryango DiDE ari nayo muterankunga mukuru w’uyu munsi, Komiseri w’agateganyo ushinzwe Igorora mu Rwego rw’u Rwanda rushinzwe Igorora waje ahagarariye umuyobozi Mukuru wa RCS, Umuyobozi w’Igororero rya Rwamagana, Uyobora Ikigo Social Reintegration Centre n’abandi batandukanye baturutse mu zindi nzego, Umunsi ukaba ufite insanganyamatsiko igira iti “Umugore ni uw’agaciro”

Komiseri w’agateganyo ushinzwe Igorora ari nawe waje ahagarariye Ubuyobozi bwa RCS, Chief Superintendent Olive Mukantabana  kimwe n’abandi bayobozi bahaye ikiganiro aba bagororwa yabibukije ko umugore ari uw’agaciro mu buryo bwose, abasaba ko bazabyaza umusaruro amahirwe yo kwiga Leta yabahaye bakaziteza imbere bo ubwabo n’abo basanze.

Umuyobozi wungirije ushinzwe Ubukungu w’Akarere ka Rwamagana, Bwana Kagabo Richard yabanje gushimira RCS ku ruhare igira mu kugorora aba bagororwa na Leta y’u Rwanda ku mwihariko yashyizeho wo kuzirikana uruhare rw’umugore wo mu cyaro by’umwihariko. Yauze ko umugore wo mu cyaro afite umwihariko, ati “ahatse byinshi,ashoboye byinshi, akora byinshi bitajyaga bizirikanwa kandi nyamara ari byo bihatse iterambere ry’igihugu n’isi muri rusange.”

Yasabye aba bagororwa b’abagore kugira imitekerereze yo kwiteza imbere bakareka imitekereze yatumye bagongana n’amategeko bityo bakabyaza umusaruro amahirwe igihugu cyabahaye yo kwiga imyuga ku buntu benshi hanze biga batanze amafaranga menshi.  Yashimiye RCS ku gushyiraho iki kigo anashima politiki y’igorora kandi ryubaka ikomeje kuteza imbere.

Abagororwa banyuzwe n’ibiganiro bahawe n’abayobozi babasuye uyu munsi, ndetse banatanga ubuhamya bw’uburyo bamaze kugororoka haba mu buryo w’ibyo bamaze kwigira muri iki kigo ndetse n’ibyo biteze kuzabagezaho nk’umugore Leta y’u Rwanda yahaye agaciro n’ubwisanzure.

Abagororwa mu buhamya batanze, berekanye ko bahindutse kandi bicuza ku byaha bakoze. Bijeje abayobozi babasuye ko agaciro Leta y’u Rwanda ibaha batazagapfusha ubusa, babasezeranya ko igihe bazaba basoje ibihano byabo bazabyaza umusaruro amahirwe bahawe yo kwiga imyuga itandukanye, ikazabafasha kwiteza imbere ntibongere kubera umutwaro igihugu kuko bafite ubumenyi buhagije bwo kwihangira umurimo.

Ibi birori byasojwe no gutanga impano aho abayobozi bari bitabiriye bageneye buri mu gorororwa ibikoresho by’isuku nk’isabune.

Ikigo cya Rwamagana Social Reintegration Centre cyafunguwe ku mugaragaro kuwa 03 Nzeri 2025 mu muhango witabiriwe na Minisitiri w’Umutekano mu Gihugu Dr. Vincent Biruta. Gifite ubushobozi bwo kwakira abagororwa 250 aho kugeza ubu gicumbikiye 169 bari gutegurwa gusubira mu buzima busanzwe.

Iki kigo kijyamo abagororwa basigaje igihe gito kitarenze umwaka no basubire mu miryango yabo, aho bigishwa imyuga itandukanye izabafasha kwibeshaho batashye. Umugororwa uri muri iki kigo hari uburyo butandukanye afashwamo agahura n’umuryango we akamenyera umuryango mugari yitegura gusubiramo bityo mu gihe azaba atashye atazagorwa no kwisanga mu bandi haba mu bijyanye n’indangagaciro ziranga Umunyarwanda, gahunda za Leta zigezweho n’ibindi.

Mu myuga itandukanye yigirwa muri iki kigo harimo:Ubuhinzi n’ubworozi bwa kijyambere,ubudozi,ikoranabuhanga, gutunganya imisatsi, iby’ubwiza(makeup), ubukanishi,gusudira, gukora amazi (plumbing),ubwubatsi, amashanyarazi,ububaji,ububonshyi bw’ibiseke n’indi mitako itandukanye ijyanye nabyo n’ibindi umugororwa ashobora kwiga ku bushake bwe bitewe n’icyo yumva azabimaza atashye nko kwiga indimi z’amahanga nk’Igishinwa, Icyongereza,Igifaransa n’izindi.

Abayobozi mu nzego batandukanye bitabiriye ibi birori by’umunzi mpuzamahanga w’umugore wo mu cyaro